ياوالله اللي طويت الياس من واحدن عندنا غالي
عليه قلب العنا منحاس ما يقدر الصبر عزالي
متخيره من جميع الناس يفرق على جيله التالي
عليه جسمٍ زها الالباس من فوقه الشقر ميالي
ياعين شيهانةٍ قرناس مدهالها نايفٍ الجالي
وخدودها كنها القرطاس في وسطها الموت يعبالي
ماشفتها مير انا حساس مجبور في بدع الامثالي
ياعنق ريمية الاطعاس ممشاك خطرٍ على حالي
ياشبه صفرا مع الادماس تمشي ورا الطارف المالي
خيالها دايمٍ فراّس يثني ورا كل خيالي
يابنت من يكسب النوماس يسوى ثلاثين رجالي
شبره طويل وطيبه ساس من لابةٍ تلحق التالي
لاهب من يمهم نساس النوم ما جا على بالي
لوطول الوقت والهوجاس ما طنتي بيتهيالي
الموت لادقت الاجراس واقفى معه دق خلخالي
ياحيسفا ياعقود الماس ان كان راحت للانذالي
لاكن ببقا رفيع الراس محبوب ولا على الخالي
فراج بن ناشي
